香港球迷冇機會明年初現場睇禾絲妮雅琪同舒拉寶娃打波，但家可以透過電視直播睇好波，WTA年終賽噚日喺土耳其伊斯坦堡開鑼，首次參賽嘅中國球手李娜今日出戰，對有「舒娃二世」之稱嘅白俄索女艾莎倫嘉。（now676台今日10:00pm起直播）
「娜姐」今季贏咗法網冠軍，不過之後狀態下滑，今次出戰年終賽講明盡力而為。佢首仗對手係啱啱贏咗盧森堡網賽嘅艾莎倫嘉。呢位世界排名第4嘅球手話準備就緒，好有信心擊敗我哋嘅「娜姐」：「我今季贏咗3個巡迴賽冠軍，雖然坐咗好耐飛機，但唔算好累，有信心迎接首場比賽。」艾莎倫嘉同舒拉寶娃都係金髮美女，外界成日將呢位白俄羅斯球手叫做「舒娃二世」，佢回應：「我就係我，唔想做邊個第2，舒拉寶娃都係咁樣諗！」