網民多麼可愛，每回惡搞海報或劇照，都有神來之筆。自煲呔力撐民望最低的林公公接任政務司司長後，即使全城憤怒抗議，無奈不能把人肉錄音機踢下台，接踵而來又有新錄音機繼往開來了。眼看政壇烏煙瘴氣，大家惟有改圖宣洩不滿。但凡惡搞，都叫人苦中作樂忍俊不禁。
煲呔與公公的合成「床照」真抵死，二男肉帛相見，歡娛無限，一個含笑捧臉：「我鍾意你EQ高！」一個含情受落：「我鍾意你戇Q高！」細看之下，惡搞的男主角，一個似鬈毛陳奕迅，一個似得意曾志偉，真有「明星相」。
近日大英子小英子為爭勤工獎，四出登台獻藝兼擦鞋，為入閘開期票討好權貴，那唔嫁又嫁又唔嫁的麗泰表嬸亦聘公關備選戰──漏夜趕科場忙得不可開交，那辭官歸故里的夕陽以及強升神枱的貓屎，都不知多輕鬆，所以才大把時間搞「課外活動」。管你港人日後死得激氣？抑或死得悽厲？
日前煲呔放個假，公公當上署理特首，木已成舟了。正是「兩岸猿聲啼不住，輕舟已過萬重山」。承擔力不足無法載重，但載人磨合得水乳交融春光乍洩，是綽綽有餘的。