腦龍周六蒲旺角，諗住幫襯克勤隻《演奏廳2011》BD，點知幾個場都出現缺貨，有貨賣嘅都由原價$185炒上$220以上。本來二百零蚊買隻藍光演唱會唔算貴，但不甘心被屈幾十蚊，都係等多幾日，睇番屋企隻DVD版算。另一驚喜，係《變形金剛3》BD喺周六突然派貨，友情價兩嚿水多啲，嗱嗱聲買隻返屋企煲。雖然呢集《黑月降臨》票房高達11億美元，又打進史上賣座片第4位，但真係唔多欣賞導演MichaelBay，借機械人把口鬧MeganFox惡死，相當小家，就連劇情推進都同博派變身一樣，又快又亂，一堆硬滑稽亦唧都笑唔出，令腦龍可安心放棄劇情，細心欣賞CG特技，同埋新加入嘅法拉利458Italia。至於BD製作，又係令腦龍心跳加速；先不論出現「搞銀錯」呢啲不知所謂嘅港式字幕，高清聲軌只有杜比TrueHD7.1，每秒流量平均得3MB，硬係覺得低頻軟弱無力，打得幾激烈都「炸」唔起。你唔畀DTS-HDMA我，都加番LPCM7.1吖，唔係驚大家嘈到隔籬屋呀？更呃錢係碟內無收錄任何Bonus，誠意極度欠奉。12月推出3D+2D藍光版，聽聞下年戲院再上IMAX加長版斬多幾両，可以想像N咁多影碟版本將陸續登場，不過都幾難要腦龍再掏腰包喇。