正當維港渡海泳、鑽一哩等老牌本土賽事相繼復辦，原定明年1月初喺維園舉行嘅香港網球精英賽，噚日突然宣佈延期；呢項盛事舉辦35年以嚟，吸引過麥根萊、張德培、費達拿、威廉絲姊妹、舒拉寶娃同禾絲妮雅琪等頂級球星，但家經濟環境麻麻，主辦單位如今搵唔到冠名贊助，政府亦唔肯出手相助，最大損失當然係廣大球迷啦！
或延期至9月上演
「過去幾個月，我哋聯絡過好多間大企業，游說佢哋出800萬至1,000萬（港元），成為冠名贊助商，但都失望而回，幾日前好無奈咁決定，將賽事押後到9月或10月。」主辦單位、香港網球贊助人協會賽務總監簡德龍非常感慨，就算將比賽延期到明年秋天，都只係緩兵之計；如果未來幾個月仲搵唔到冠名贊助，比賽就要取消，會係35年嚟首次，「近幾年每屆賽事總開支約2,500萬元，單係一線球星嘅出場費已過千萬；如果我們downgrade比賽，搵啲3、4線球員參加，就好難吸引球迷入場。」
其實，對上兩屆冠名贊助都係政府屬下嘅盛事基金孭重飛，但贊助費一年少過一年，由去年900萬減到今年初嘅500萬；主辨單位要自己出400萬，確保比賽可以搞得成。簡德龍補充：「政府政策係首年贊助最多，然後每年遞減；如果私人機構贊助越多，政府就可以出少啲。」
維園網賽雖屬表演性質，但因為賽期喺澳網前兩周，好多球手都鍾意嚟香港當熱身；其中禾絲妮雅琪大半個月前突然話唔嚟香港，改去澳洲布班斯班打熱身賽，已露出賽事延期端倪。我求大俠記得90年代，香港曾經有沙龍男子職業網球賽，同埋萬寶路表演賽，可惜當局立例禁止煙商贊助，兩項比賽都成為集體回憶。
政府態度唔積極，家鄰近嘅廣州、上海、北京、東京、吉隆坡同曼谷，都舉辦男、女子職業計分賽，用盛事提升城市形象；反觀香港呢個「亞洲國際都會」，大型賽事真係寥寥可數。有時，我求大俠真係唔係好明負責體育嘅官員諗乜！
香港網球精英賽小資料
首屆年份：1976年
舉辦地點：維園網球場
上屆部份參賽球手：李娜（中國）、禾絲妮雅琪（丹麥）、施禾娜莉娃（俄羅斯）、威廉絲（美國）、艾保（瑞典）、張德培（美國）、卡菲尼哥夫（俄羅斯）
歷年部份冠名贊助商：高露潔（77-79年）、精工（80-87年）、萬寶路（88-97年）、屈臣氏蒸餾水（00-01年04-07年）、JB.Group（08-09年）
奪標球手（只列部份）：舒拉寶娃（俄羅斯）、威廉絲（美國）、施莉絲（美國）、費達拿（瑞士）、干納斯（美國）、蘭度（美國）
資料來源：《蘋果》資料室