隨住洛杉磯銀河(白衫)喺星期日嘅美職聯作客不敵侯斯頓戴拿模(橙衫)1:3之後,今屆美職常規賽正式煞科,銀河成功衞冕西岸冠軍及常規賽冠軍,而戴拿模則成為東岸冠軍。喺星期三,季後賽就會展開喇!銀河除咗想打好今屆季後賽,唔好好似上屆咁爆冷喺西岸總決賽中出局之外,亦忙於留住35歲嘅星級中場碧咸。碧咸同銀河嘅5年合約,喺下個月就屆滿,現時傳得最勁係佢可能加盟巴黎聖日耳門;不過,銀河依然唔放棄,銀河嘅總經理拉拿斯就話,仲有5成機會可以留住萬人迷喎!