據聞波叔鄧成波近排東征西討，喺東九同西九都收咗唔少靚貨，包括翻兜美孚新邨個商場，咁啱華華同波叔細仔鄧耀昇（阿Stan）飯敍，自然問吓佢老竇有乜大搞作。
揸東九靚貨 翻兜美孚
阿Stan話，施政報告要「起動九龍東」，老竇兼老闆收咗唔少東九靚貨，等時辰到啲貨活化、改建時就會蒲面，叫華華咪咁心急。
至於翻兜美孚，原來背後有古仔聽，話說，當年美孚新邨落成嗰陣，波叔買咗其中一座嘅半幢用嚟投資，唔講唔知，嗰次原來係波叔人生唯一一次買新樓，之後，佢仲買埋個商場。直至97年減磅，佢先將件貨易手。今次買返，波叔打算將佢活化成西九新icon。
講完老竇，華華當然要問吓阿Stan自己嗰檔婚禮統籌業務──拉婓特。佢話都算上咗軌道，嚟緊11月11日呢個「6條1」結婚大好日，就有逾30幾對新人幫襯，佢初步諗緊擴充業務。除咗搵錢，阿Stan都不忘公職，聽晚佢就幫城市青年商會搞咗個青商簡介會@人脈存摺，踢18至40歲有為之士入會。百足咁多爪，果然虎父無犬子。
李華華
mailto:[email protected]