一向珠光寶氣嘅朱太、金利豐金融（1031）行政總裁朱李月華，上個星期五同傳媒見面，講吓收咗隻國中控股（202）返嚟之後點搞作。
話時話，華華嗰日唔敢正眼望過去，皆因朱太嗰日真係閃爆，先唔講佢攞住嗰個桃紅HermèsBirkin、頸上面嗰兩排龍眼咁大粒嘅珍珠，淨係手腕上面嗰隻Cartier都夠你買樓做首期兼裝埋修。
朱太嗰隻係balloonbleudeCartier系列嘅DiamondRiver大號腕錶。18K鍍銠白K金、鑲梯形鑽石，錶的設計有粒凸圓形藍寶石，自動上鏈機芯，防水深度30米。零售價118萬。你話係咪夠買樓嘅首期有凸。
講開又講，朱太一家同老竇李樹褔上星期六搞咗場長者盆菜宴，招待鴨脷洲老人家。今次盆菜宴係第九屆，開咗168席。難得福哥喺度，華華問佢點睇博彩生意。佢話旗下黃金廳客戶過萬，客源分散，大陸經濟差啲，都唔怕賭仔走數。