開心飛起：芝加哥WickerPark　希拉莉十分鐘印T

在街上問路人芝加哥有甚麼新蒲點，十個有九個會介紹你去WickerPark，嗰度除有城中最新最齊的Vintage物品外，仲滿佈不少潮店，難怪連希拉莉都留低過腳印，還願意花上10分鐘等印潮Tee。

記者、攝影：李鑒泉
鳴謝：國泰航空、ThePeninsulaChicago

愛上懷舊風

■店員Victoria及Meghan明顯地一副model模樣。

從19世紀開始，WickerPark就已經成為波蘭、德國及俄國移民的落腳點，多年來龍蛇混雜成為九反之地。直至市政府十多年前整頓該區後，不少畫廊、設計室陸續進駐，成為新興潮區。而由兩個識於微時的80後設計師Kelly及Elizabeth開設的Eskell正是她們讀書時建立的女裝品牌，產品更在百貨公司上架。現在她們走復古路線，除利用舊物料設計外，更將不同圖案與經典設計合而為一，營造自成一格的懷舊風，向當代女性致敬。除自家品牌外，兩位設計師更會周遊列國搜尋特色二手衣物及飾物，貨品大多是獨一無二，且好快斷貨，手快有手慢無。

■店面裝修簡約，而且更設有沙發讓顧客休息。

■二手高跟鞋約$330。

■二手針織Levis衞衣，約$374。

■自家設計絲做連身裙約$1,755。

■女裝側揹袋約$530。

Eskell

地址：1509N.MilwaukeeAve,Chicago
電話：（1）7734860830
網址： http://eskell.com

冷藏櫃藏Tee

雖然我自問無乜藝術天份，但睇完咁多畫廊及小店後，總是心癢癢想小試牛刀，於是我就去了TheT-ShirtDeli自家製Tee。咦，點解門口有列冷藏櫃？原來係用來擺放不同的樣辦Tee供顧客選擇，除了5,000款指定圖案外，唔啱心水更可以自己用紙寫出英文字母或圖案，大約10分鐘左右就熨好搞掂，連ToteBag、BB衫甚至狗仔衫都可以設計，所以連國務卿希拉莉都幫襯過，認真巴閉。採訪當日就遇到來自法國的情侶做情侶Tee，sosweet！

■蘋果教主SteveJobs逝世當日印製的紀念Tee，幾個鐘就賣出十幾件。

■店長表示每日平均都印製50至100件Tee，產量驚人。

■連狗仔衫都可以設計，約$70起。

■來自法國的情侶自製情侶Tee，每件由$140起，額外每隻字約$7.8。

TheT-ShirtDeli

地址：1739N.DamenAve,Chicago
電話：（1）7732766266
網址： http://www.tshirtdeli.com

復刻單車扮型必備

在WickerPark過馬路除了小心汽車外，更要小心失驚無神撞過來的單車，幾乎每個燈位前總有3、4部單車等起步，更有唔少係singlespeed的復古車。售賣多個復古品牌如Velorbis、Abici及Batavus的CopenhagenCyclery位於cafe旁邊，吸引唔少單車客飲完咖啡後過來買單車。其中丹麥設計、德國人手製造的Velorbis設計忠於50年代，包括U形手把、前後泥擋及後輪鎖等，一切都源於1958Regular設計，騎出街收視率極高。此外更有Brooks車用皮包及皮坐墊售賣，可隨時幫愛車扮靚靚。

■塗上紅色的VelorbisDannebrog是店內最好賣的型號之一，約$11,700。

■日日騎着單車返工放工的Jennifer指單車已經是當地人生活的一部份。

■Brooks真皮單車背囊，約$2,956。

CopenhagenCyclery

地址：1375N.MilwaukeeAve,Chicago
電話：（1）7734560024
網址： http://www.copenhagenbike.com

男士古着集中營

相對女裝而言，尋找男裝古着就如大海撈針，幸好同樣位於NMilwaukeeAve的uNaMae’S以男裝掛帥，幾乎半間店都是陳設着男裝衫褲鞋襪，當中包括20多個歐美男裝品牌，而Brixton、Gravis及RedWing等通通有新貨，從M65軍褸到皮靴均有選擇，部份激似日系款式，仲要fit東方人身形就更吸引。而且更闢有二手區，價錢平均只係原價一半，掃貨最抵。女裝反而吹起民族風，店員更指最受歡迎的是波希米亞feel羊毛披肩，穿上身一定暖笠笠。