喺呢個「牛熊共舞」嘅大時代，滙豐總行外面，每日有大批示威者全天候佔領中環；而滙豐分行裏面，銀行小職員就十足杜琪峰套《奪命金》咁，日日俾阿姐捽交數、要你上堂學sell基金，慘到幾乎要晚晚係office內紮營過夜call客，看更收工你都未有得走。
患上星期一恐懼症
八方所講嘅係真人真事，有位喺滙豐銀行北角分行返工嘅朋友同八方講，佢哋係全滙豐公認係最癲嘅分區，朝八晚八未算慘。若果要上培訓班，一般係要上到晚上10點。做銀行有邊個唔要跑數呢？老細以前要佢哋一個月交一至兩次projection，之後每星期逼佢哋交一次，家仲變態到每日問住。佢話早前佢哋有同事因工作壓力大而心臟病猝死，分行內唔少同事都因壓力失眠。
咪以為放兩日假就好好過，呢位小職員話，佢家已患上星期一恐懼症，因放假後要重回殘酷現實，好多人星期日晚都瞓唔着。佢話有家室嘅同事更加可悲，好以佢咁，忙到晚晚都冇時間同家人食飯。佢曾經俾老公冷嘲熱諷，喺小朋友面前單打話，媽媽做嗰間銀行，係24小時營業㗎！佢要返銀行紮營過夜，唔使返屋企㗎喇！
呢位小職員喺滙豐做咗差不多成廿年，試過捱到生瘤，做手術割咗，醫生叫過佢唔好畀咁大壓力自己。家陣呢個時勢，佢好驚復發，仲同八方呻「唔通要好似《奪命金》個何韻詩咁夾帶私逃，先可以擺脫厄運？」睇怕遲早有一日，呢位銀行小職員要同總行樓下嘅示威者，嚟個裏應外合！
mailto:[email protected]