涂國彬結婚之夜，婚宴司儀林超榮送佢一本書做禮物，就係林太屈穎妍嘅暢銷書「怪獸家長」，提醒佢快啲做阿爸，但避免變成怪獸家長。左丁山於是順便祝福肥仔涂，叫佢一於效法林超人，四年抱三，夠晒生產力兼快捷妥當，老來便知幸福。
肥仔涂結婚之日，據云中大有「怪獸家長」風波，中大著名生物科技教授林漢明在facebook講及怪獸家長，指一啲家長代子女出席中大資訊日，太太在實驗室做實驗，丈夫全程拍攝錄影，話係交俾子女去睇嘅喎。何故要入大學嘅子女不到中大，要兩父母代勞？林漢明教授以日本名詞「怪獸家長」形容之，後來引起一些家長對號入座，向中大投訴林教授侮辱。
消息傳來，成班人噓聲四起，指一啲香港家長溺愛子女過甚，毫無道理，代子女出席資訊日以至投訴林教授言論，匪夷所思啲啩。中大校長沈祖堯聽講話要調查，都唔知調查甚麼。成班校友對左丁山講：「沈校長最好話俾呢啲家長聽，請你地唔好代仔女填表申請入讀中大！」
有呢啲學生及其家長，幾煩㗎。林超榮識講故事，曾透露某大學有位學生由媽媽陪同入課室，要求做埋旁聽生。為何如此？阿媽驚二十歲嘅女兒唔識路，送佢到大學，索性入埋課室喎！又有一對夫婦向導師發律師信，指導師「肥咗」佢地個仔，嚴重影響兒子前途，導師翻查資料，呢位學生經常走堂，欠交論文，大考唔及格，唔通仲想及格畢業？
如此家長，愛兒女反而害兒女。好心啦，等兒女獨立行事，犯吓錯，俾同學欺負，未必係壞事。
呢日與四位中大靚女強人在Pierre吃過午餐，佢地走前門到干諾道中等司機公司車，左丁山由後門行出遮打道，即刻遇到窩輪高人靚女K，問佢：「開咗市咯喎，仲行街買靚衫？」靚女K話：「非也，我已逐漸淡出，就快辭職回家湊仔，全職為佢搵幼稚園。」吓？駛唔駛呀？靚女K話：「大師兄有所不知，我個仔兩歲咯，如果搵唔到好幼稚園，以後派位讀小一好麻煩，跟住……」哎吔，又一位金融精英為子讀幼稚園而辭職不幹，現代媽媽俾自己好大壓力！