曼聯前日喺曼市打吡兼英超榜首戰，以1:6慘敗喺曼城腳下，見慣風浪嘅領隊費格遜賽後話，呢場係佢足球生涯最大敗仗。估唔到近季喺本地球壇呼風喚雨嘅南華足主羅傑承，前日可能仲黑過費Sir，因為佢先喺跑馬地馬場投注櫃位前跣親，撻落地兼整親右手；俾人笑完，名下愛駒「軍事行動」又三甲不入，而太太做董事嘅飛馬同晚又不敵傑志，絕對可以話係黑爆嘅一日！
馬迷醒唔買軍事行動
羅生噚日凌晨喺南華部落分享其「黑仔」事件嘅經過，求大俠當然唔會錯過。佢話前日跑馬地跑日馬，因為保良局盃加上佢同羅太梁芷珊名下愛駒「軍事行動」喺尾場出戰，所以提早入場，點知經過投注櫃位時因地滑；加上着住皮鞋嘅佢可能行得快，稍不留神就跣腳慘變撻生魚，好彩有熱心馬迷即刻埋去扶起羅生。
當時投注櫃位附近有幾十個馬迷，羅生當眾跌親已經瘀爆，仲要有認得羅生嘅馬迷即時彈一句：「一陣第10場唔使買佢隻馬（軍事行動）啦！」羅生見場面尷尬，多謝完扶佢嘅朋友，就飛快離開現場；佢又話跌落地時因本能咁用右手撐住，右手腕好鬼痛。
忍痛到尾場，結果「軍事行動」真係三甲不入，之後同羅太趕去將軍澳運動場，睇飛馬作客傑志場港甲大戰，點知飛馬臨尾香輸2:3，連輸兩場。據在場見到羅生同羅太離場嘅球迷報料，佢兩個都黑面離場。
飛馬臨尾香黑面離場
黑氣纏身嘅羅生返到屋企開電視睇曼聯、車路士同熱刺幾隊支持開嘅英超球隊，點知曼聯大敗畀曼城，車路士作客昆士柏流浪有兩個紅牌之下輸波，由朝黑到晚嘅羅生喺呢一刻終於忍唔住喺部落講：「今晚我看得不爽，無話可說！」
羅生噚晚笑笑口，話右手腕傷勢已經好番啲，應該只係扭親條筋，相信冇骨裂，仲話多謝各位關心；不過佢諗番起喺咁多馬迷面前跌親，確係好鬼尷尬。