今年城中閃婚潮、生仔潮興旺，除了圈中女星密密生，陳小韻原來月前也榮升媽咪，今年8月中生下第一個兒子Liam，現時全職湊仔，做幸福媽咪，至於會否再生，陳小韻就表示希望再追多個囡囡。
陳小韻年前嫁給商人KinChan，婚後幫媽咪打理家中的製衣及童裝生意，近日她在facebook上載了自己帶囝囝出街散步的相，晒幸福家庭樂。
眼嘴分別似父母
昨日陳小韻接受訪問時，表示自己現時少去社交活動，只想低調湊仔，不過她都開心分享生活，表示囝囝是計劃之內，她說：「OK啦，結婚嗰時都話咗會生，咁一步一步咁發生，家咪生仔囉。」囝囝取名Liam現時重約13磅，眼仔睩睩似足爸爸，小嘴似媽咪。
問陳小韻可覺做媽咪辛苦？她表示湊仔其實很開心很簡單：「Happy㗎，幾好，我都唔知乜叫辛苦，我都係第一次生，個個做人媽咪都係咁㗎啦，不過真係幾開心，每日睇住個仔。」從相片中所見，她身形似乎回復未生前，收身大計相當成功，陳小韻說：「呢啲梗要啦，自己努力啲囉。」
唔介意囝囝出鏡
至於會否再生？陳小韻說：「順其自然，不過你祝福我追個女。」現時童星流行，問她是否有人打囝囝主意？她說：「冇呀，有都唔介意，但我暫時想佢低調啲囉。」
採訪：林妙萍
