丁子高前晚搞時裝品牌派對，並與老婆楊千嬅齊齊出席，千嬅以真空透視露背裝現身，還着上8吋高的高踭鞋，記者再問到二人造人一事，千嬅即場鬧爆老公之前失言，但丁子高依然忍不住爆響口說每個月都有機會成功造人。
楊千嬅前晚現身中環ifc，出席時裝品牌HugoBoss派對，由於是老公丁子高做公關搞手，千嬅特別「加料」性感，她着了透視露背黑色晚裝出現，還真空上陣，並腳踏8吋高踭鞋，丁子高細心地扶着千嬅腋下而來，同場還有劉青雲、郭藹明及杜琪峯夫婦等。
只限露靚背
千嬅受訪時笑言：「我又行錯路，頭先嚟經過AppleStore，好多人望住我，佢（丁子高）扶到我好似個犯咁，好樣衰。」問到丁子高會否介意千嬅性感露背？他表示：「唔會啦，有咁靚嘅背，我都願，不過前面唔好搞咁多嘢。」
談到生仔經，千嬅即再鬧老公早前大爆出位性愛姿勢：「佢同人講啲咁嘅嘢，黐線，亂講嘢，如果真係咁做，要睇脊醫，好似風月版咁。」
行路姿勢差
被老婆鬧完的丁子高繼續講生B一事：「每個月都有機會，希望成功。」記者再問兩人今個月會否成功？千嬅表示：「今個月未知。」而丁子高即笑言：「如果佢有咗，都唔會畀佢着咁高嘅高踭鞋，醫生話着高踭鞋有影響，個位唔好。」千嬅即示意老公：「唔好亂講嘢，我知自己行路好衰格。」丁子高即補充：「佢好似潛水員上水行路咁。」
採訪：譚倩宜
攝影：黃文偉