每個女仔對悠閒生活都有一個憧憬，第一係希望唔使做；第二就係揸住部開篷車，跟自己的最愛……並非男友或老公，而是帶住愛犬四處郊遊。揸乜車最啱Feel？最近重新力推的Fiat500C，開篷開到後尾枕迎接秋高氣爽天氣，爽呀！
記者：蕭漢祥
攝影：王文忠、陳盛臣
Model:CindyYeung@StarzPeople
型爆開篷芒果
自從Fiat500復刻版回歸香港市場，一班年輕買家都將它定性為「玩樂型汽車」，車主群年齡介乎18至30歲的年輕人。這班人最愛乜？咪就係玩囉！適逢最近天氣凉凉哋，溫度徘徊於攝氏25度左右，唔好話人唔怕熱，就算揸住開篷車，狗狗都唔怕曬，所以又係時候揸Fiat500Convertible出動。雖然開篷版Fiat500並非新鮮事，不過廠方最近力推的鮮黃色開篷的確較少見，是繼數月前推出的藍精靈版500仔之後，相信是女士們另一喜愛之作。
軟篷無阻尾箱空間
為甚麼是女士們喜愛？皆因Fiat500Convertible開篷之後，擁有特大開揚環境，而且摺叠式軟篷完全無影響尾箱的載貨空間。你知啦，若然一開一關都要美女司機重新執拾尾箱物品，相信必然心火盛兼棄車回家。另外，值得一讚的是當軟篷全開時，雖然會阻擋尾箱門的打開，但廠方早已加裝感應器，當感應到車主打開尾箱，軟篷會自動推高，尾箱關閉後亦會自動拉下，非常方便。
而車身到內櫳的貫徹格調，好似今次的芒果黃由車身到內櫳的中控台，配上全黑色意大利真皮座椅，撞色撞得恰到好處，論外在已經魅力沒法擋。最重要的是，這部開篷依然設有A、B及C柱，即使開篷後仍可關上兩邊玻璃窗，防止狗狗跳出車外，安全最緊要嘛。
百匹小車子夠靈活
除了外表，其實Fiat500的性能同樣好似為女士們而設，1.4公升引擎輸出100匹馬力，雖稱不上澎湃力量，但以不超過一噸的車重，以及用上更為靈活的195/45R16軨軚，比1.2公升版本大1吋，使到行車表現不俗。即使不少女士們對棍波操控反感，有時照顧得旁邊的愛犬時又轉唔切波檔，駕駛5前速加減波的Fiat500，既可將力量輸出操控自如，又可減省踩極力子的煩惱，更有充份時間享受開揚天幕帶來的溫暖陽光，呢種咪就係悠閒生活囉！
承辦Fiat及AlfaRomeo兩大歐洲品牌的太古車行，於本周末假九龍塘又一城舉行車展，其中部份車提供高達$38,000優惠，同場更有專營汽車精品品牌Black展出，要買車同幫部車裝身，真係可以一次過。
Fiat500Convertible1.4Lounge
引擎：1,368cc直4
馬力：100bhp/6,000rpm
扭力：131Nm/4,250rpm
傳動：5前速+/-波箱
售價：$239,888
查詢：29219999（太古汽車）