地產大好友信置（083）見同嘉華國際（173）合作發展嘅港島深灣9號，近排賣得唔錯，唔好執輸，即刻開賣自己獨資發展嘅九龍塘逸瓏。
太子爺黃永光（圖）同老竇黃志祥一樣，做嘢鍾意親力親為，噚日星期日都犧牲埋，御駕親征，去咗九龍灣示範單位視察，仲親自向睇樓客講解樓盤。
太子爺話，個盤對外開放咗幾日，已經有2500個客嚟睇過，好滿意，仲話現場撞到唔少朋友。講得興起，仲自爆細個喺拔萃男書院小學部讀書，以前返學日日出入呢區，所以好熟悉又好鍾意。
之前香港仔深灣9號開賣時，太子爺話「我細個都喺呢區長大，好鍾意呢區」，今次又話細個喺九龍塘讀書，太子爺似乎特別鍾意揀喺自己成長嘅地方發展項目。