大市毫無方向，買賣兩閒，但窩輪及牛熊證繼續喪炒，佔大市成交近半，不過大戶用超級電腦炒，量又夠大，一兩格已經有肉食。散戶去炒的話，無論在資訊、技術同資金上都處於劣勢，比過大海博一鋪更蝕章，炒嚟做乜？
在此市況下，要短炒惟有向細價股出發，但當然風險較高。香港資源（2882）名字可能較陌生，其實佢係珠寶股，核心業務為金至尊珠寶嘅零售業務。公司日前公佈，國慶節假期7日，金至尊珠寶嘅總銷售額達1.78億銀，按年大升1.13倍。另外，公司上季總銷售額8.86億銀，較去年同期增49%，內地市場銷售額更大升62%至8億銀。今年內地自由行大旺，業績料相當有睇頭。
所謂同股唔同命，香港資源都係珠寶股，但估值及股價都落後同業九條街。周生生（116）PB有2.4倍，英皇鐘錶（887）係2.9倍，六福（590）更高達4.3倍，但香港資源得1.2倍，至少折讓5成；股價今年更累跌56%，同業平均都有單位數升幅，可見現價根本未反映香港資源業績大躍進。近期出現「黃金交叉」後，成交及股價開始起動，加上貨疏易炒，可小注吸納，博見5毫。
魏力