近日政圈中人碰面必定問，「究竟唐唐緋聞頂唔頂得住？」言下之意係佢民望會否因此大跌，待12月選委選舉之後，迫使阿爺換馬。挺唐派打出「課外活動論」、「人不風流枉少年論」。又引用克林頓、希拉克等外國風流政要，力證私生活與公職無直接關係。但始終冇講出走出醜聞嘅關鍵所在。
想知大家不妨睇吓最新例子，曼聯之寶球星傑斯，既搭上弟婦，又再有外遇。傑斯仲衰申請法庭禁制令禁止傳媒報道，結果有議員借國會發言議論此事，傳媒乘機跟進突破封鎖。傑斯與英國傳媒關係全面惡化，互相指摘，他好男人形象盡喪，一沉百踩。
靠真誠意志挽民心
車仔迷也幸災樂禍，認為傑斯受醜聞困擾，表現肯定走樣，季尾在即，英超及歐洲聯賽已近尾聲，曼聯受此打擊，車仔將有機可乘踢曼聯出局。結果傑斯在球場沉着應戰，以體力技術多次爆入禁區助攻得分，協助球會打入歐聯決賽，成功衞冕英超冠軍，又一次將車仔打敗。
傑斯雖無法彌補已遭毀滅的好男人形象，但卻以球場表現贏回球迷的尊重，尤以曼聯資深女球迷紛表示已原諒了傑斯。醜聞不一定會毀掉一個公眾人物，但處理醜聞的手法卻會致命，因為公眾會由此看到公眾人物是否真誠？是否有堅強意志？
傑斯剛與太太在蒙地卡羅領取由國際資深記者提名、球迷投票的金足獎，說明了醜聞冇毀掉他足球成就。
唐唐要走出緋聞之門，是要令人感受到他誠懇與堅強意志，可惜大家見到卻係去鄉議局拜票，支持放寬丁屋可建層數，赤裸裸小圈子利益交換，看在公眾眼中，呢類醒目仔政客作風，又點能贏回市民對他的尊重？民望回升又有何着力點。幸好另一位振英哥也是短視政客作風，千方百計討好鄉事，不懂趁機站回主流民意，反對新界特權，攞盡道德高地。唐唐才有一線生機。
添馬男