一名戴着冬菇頭假髮的八十後，近月自拍多段搞笑短片，棟篤寸盡曾蔭權、唐英年、李嘉誠、曾偉雄等權貴，引起數十萬網民注視。《蘋果》起底組發現，冬菇男李小為大學畢業，但會考零分；熱衷時事，但從前漠不關心政治；創意最澎湃一刻，正是失業惆悵在家時。他的際遇，本身就是個充滿黑色幽默的故事。
像「八十後黃子華」，小為讀大學時也是主修哲學，搞gag亦笑中有淚。YouTube是他的紅館。「昨日，我吊吊揈落街，跟住返屋企玩我嘅Ｘbox衫錄拎……」擺好攝影機，小為連珠炮發「回應」唐英年：香港人為何做不到下一個李嘉誠。「第一個李嘉誠係由好多不怕辛苦、唔埋怨嘅香港人『做』出嚟㗎。」「你知唔知道李嘉誠唔係整完出嚟擺係度就得㗎？香港市民係要不停供養佢㗎！」「你知唔知整一個李嘉誠，我哋同時要整好多個犀利哥出嚟㗎？」
一月內六萬網民瀏覽
轉頭他又扮主播「報新聞」，說警員患上一種會見到黑影的怪病，「呢個並唔係叫做黑影，係叫做黑暗」，嘲諷警務處處長曾偉雄胡扯記者是黑影。小為從前不留意時事，直至去年反高鐵等事件後，「唔覺意留意到」社會問題，驚覺要用創意喚醒更多人關注。兩段短片，不足一個月吸引逾六萬網民瀏覽，他曾拍片諷刺曾蔭權，吸引逾13萬人收看。
「呢個時代，互聯網加搞笑，係最有效嘅渠道」。拍片抗爭，因他忍無可忍。「黑影都講得出，擺明係反正我信了嗰隻，好無恥！」「唐英年問我哋點解做唔到李嘉誠，喂，邊個話我哋要做李嘉誠呀？我只想個社會唔好咁壟斷，畀到機會、空間我哋去發揮自己嘅興趣咋！」
小為在嶺南大學哲學系畢業，但他從前是個典型港孩，「上堂瞓覺，放學打機」。他考了兩次會考，第一次考獲零分，「唔想咁快做嘢，咪重讀囉」，重考得五分。「冇讀過書，結果好合理」。讀書不成，終要搵工，到小學做電腦助教，「每日幫小學生開機熄機」。
自信拍得住《頭條新聞》
他愛哲學，曾「幻想」做老師，在課室「收」，訓練一班會思考的學生，「但原來做老師，影響唔到幾多人」。拍短片掟上網，影響力反而更大。他曾拍過一段「港鐵冚家坐」的短片，諷刺香港人不讓坐，「其中一個留言話，你做呢段片，影響力大過你讓一次坐」。
小為自信他的短片「拍得住」《頭條新聞》，但他現正失業，家人快「支持唔住」。「或者遲吓會搵份洗碗工，等我放工後有番啲時間諗題材拍片」。他認為思考、創作比搵錢重要，「香港人根本冇時間去諗嘢，放工搭車都要睇住部iPhone」。香港要發展創意產業，諷刺是，或許要在失業時，香港人才會有創意。
記者 雷子樂