城市電訊主席王維基近日再出招，有指他連無綫金牌監製劉家豪、梅小青夫婦都想挖走，前晚梅小青強調12月放假時再諗，總之她會與老公共同進退。至於向無綫提前解約的馬浚偉，則直言接受不到無綫經理人運作，似乎去意已決。
馬浚偉、高海寧（高Ling）、葉翠翠及監製梅小青前晚在尖沙嘴出席無綫新劇《當旺爸爸》煞科宴，高Ling以一襲白色貼身裙谷爆登場，但似乎胸圍尺碼不合適，事後她尷尬否認戴錯bra。
同監製老公共進退
近日有傳王維基連無綫金牌監製劉家豪、梅小青夫婦都撬走，有指《當》劇是梅小青在無綫最後一齣劇，前晚梅小青強調近年拍了很多劇，需要好好休息，待12月放假時再諗，強調錢並非最重要。問她是否與老公一齊過檔？她說：「老公仲有個劇11月開，我同老公走會一齊走，留會一齊留，但我同TVB合作開心，要考慮嘅唔只講錢，亦唔只傳聞得王維基，好多地方搵我哋。」小青強調暫時未有意向，她又說與無綫一班兄弟姐妹合作多時，不會捨得走。
馬仔感激志雲打救
馬浚偉近日向無綫要求提前解約，有指是因有人替他推走國產劇，而令馬仔對無綫死心，馬仔前晚表示11月1日會赴內地拍內地劇《建元風雲》，即之前被推掉那部，他說：「陳志雲、李寶安傾好咗，喺我合約上有少少修改，所以接到部劇，好感激兩位。」問馬仔會否因此留低無綫？他坦言有否接該劇，與之前提出的提前解經理人約，不會因此事改變。問他是否仍在拉鋸中？他說：「唔算拉鋸，感激管理層好坦誠傾呢件事，希望返內地前大方向有共識，等我可以安心拍呢套劇。」
問馬仔是否去意已決？他坦言在無綫做了18年很有感情，只是近6年才簽經理人約，他說：「成個經理人部門嘅運作，對我嘅安排，我都有啲意見，係唔太接受到嘅方式。」問他是否指樂易玲？他說：「我唔係針對人，只係我唔適合呢個處事方法。」馬仔稱暫時與陳志雲傾得很開心，至於有否與樂易玲傾？他說：「家就冇喇。」
採訪：胡比 攝影：陳俊強
