禮拜三水原藍翼主場0:2不敵艾薩德引發群毆（圖），有客隊職員被打斷鼻骨。除咗球員外，原來仲有藍翼球迷由看台跳落球場打埋一份，事後好多西亞傳媒都用「亞洲足球之恥」嚟形容件事，要求重罰藍翼。
亞冠盃4強次回合下個禮拜三到藍翼作客，亞洲足協會盡快完成調查。據報，藍翼除咗有機會被取消亞冠盃資格外，最重懲罰將會係禁止參加亞洲賽1年同罰款5萬美金。藍翼反指，艾薩德球員打球迷亦都有錯，要亞洲足協公平處理。
毆鬥事件事緣完場前10分鐘，當時兩隊各有球員受傷，藍翼將波踢出界，之後當藍翼球員以為艾薩德球員會將個波俾番佢哋時，艾薩德前鋒尼安竟然好冇品咁帶住個波長驅直進，仲入埋，搞到藍翼極不滿。至於另一支韓職球隊全北汽車（圖綠衫)作客贏伊蒂哈德3:2，或者有機入決賽，幫藍翼報仇！