34C陳法拉前年在《有營煮婦》剝衫露bra全城譁然，想不到34D的陳茵媺前晚在《法證先鋒III》更令觀眾熱血沸騰，網民激讚她身材更勝法拉，前晚一集更以平均30點收視，撼贏法拉在《有》劇的28點收視，換言之陳茵媺今次剝贏法拉兩點，果然長江後浪推前浪。
橋唔怕舊，最緊要受。無綫繼09年在電視劇《有營煮婦》中大灑鹽花，安排陳法拉剝衫露bra通屋走而掀起全城熱話後，近日無綫重施故技，在前晚播映的台慶劇《法證先鋒III》，安排陳茵媺除衫露黑bra。劇集播出後引起觀眾及網民熱烈討論，不少觀眾紛紛將法拉與茵媺露bra一幕比拼，大讚30歲的陳茵媺擁34D豐滿上圍，比29歲擁34C上圍的法拉更有睇頭，甚至指茵媺男友陳豪是「識食」之人。
廣管局冇接投訴
儘管陳茵媺前晚露bra一幕未令《法》劇收視飆升，但前晚一集平均收視有30點（約192萬觀眾），比起09年法拉露bra的《有》劇28點平均收視（當年觀眾人數為178萬），陳茵媺以兩點之差成功撼贏法拉。至於當日法拉露bra令廣管局接獲26宗觀眾投訴，但陳茵媺前晚同樣一露，廣管局方面竟是零投訴，認真同人唔同命。
據悉陳茵媺前晚一露不但惹來觀眾很大迴響，而且引起內衣廣告客戶注意，欲力邀她合作。原本陳茵媺昔日接job酬勞約1.8萬元，自與陳豪拍拖後人氣大升，酬勞亦跳升到4至5萬，如今再加埋露bra，令人氣再度跳升，接job酬金誓將直逼陳法拉的7萬。
「我想陳豪睇吓」
早前陳茵媺接受訪問時，早已預告有露bra一幕，當日她還揚言是自己事業上一個大膽嘗試，為以最靚一面示人，她還自掏腰包花費3,000多元買bra。當日陳茵媺說：「我特登shopping買，希望可以型啲，同平時個款唔同，型得嚟有女人味，但唔係過份性感。」事實證明，陳茵媺今次一露已值回票價。
人氣再升的陳茵媺昨日與黎耀祥於將軍澳出席超市活動，兩人即場推車玩遊戲。講到前晚除衫露bra獲網民大讚，陳茵媺直言多謝眾網民稱讚，她說：「呢場戲都係劇情需要，配合番個角色，係我入行演戲最大膽嘅一次，拉高收視冇緊要，唔好拉低收視就OK。」雖然年前陳法拉亦同樣於劇集中露bra，但陳茵媺表示不擔心被比較，她說：「佢嗰場戲我冇睇過，但唔相信會比較，始終角色都唔同。」她直言劇中心口刻意畫上一粒痣，也是角色需要。
對於被指上圍比起當年參選時縮水，陳茵媺直言不想再討論這話題。男友陳豪早前出席活動時，揚言不會看她露bra一幕，問她陳豪前晚可有收睇？她說：「佢前晚開劇所以應該冇睇，不過我都想佢睇吓，想佢畀啲專業意見我。」至於會否考慮重演真人版時，她說：「叫佢自己上網睇番啦！」
法拉盼分豬肉獎
陳茵媺與陳豪近期被傳以低價情侶檔搶job，她說：「向來都唔知價錢，都係公司安排，自己有機會就做，總之做好自己工作。」
身為超市代言人的黎耀祥，對於近日有報道指超市價格過高，他說：「呢啲好難講，大家打開門做生意都要維皮，但係超市絕對提供舒適嘅環境同方便畀到大家，呢樣冇得比較。」
另外，陳法拉昨日出席尖沙嘴剪綵活動，對於今年角逐視后被胡杏兒迎頭趕上，法拉說：「唔關事，我自己不嬲覺得其他女仔都好好，我自己求其有個牛肉豬肉獎都冇所謂，都係志在參與，冇太大期望，我自己都睇好杏兒，今年佢好多作品，進步好多。」
採訪、攝影：林妃、王崇穎、楊潔雯、林德雄
網中吟：「男人婆得嚟好正」
陳茵媺在前晚播映的《法證先鋒III》剝衫晒bra，一眾網友熱烈讚她樣靚身材正。
行屍走肉：女神陳茵媺有甜美笑容有波有腳，陳豪真識食！
踢拖上深圳：男人婆得嚟又真係好正！
火雲掌：已經係少有肯博嘅無綫姐仔。
法比傢俬：想學法拉呀？大好多，法拉除咗得個bra型而無實。
Hitzlsperger：陳茵媺短髮真係好正！
資料來源：高登討論區