如果你有千萬身家，事業有成又成家立室，生活肯定爽爆，楊千嬅絕對有這個優質條件，但每天她被禁飲酒、禁冷飲、禁冷氣、禁消夜，甚至被禁夜瞓上網，連行路姿勢都要被管，千嬅嗌晒救命話「飲包凍飲都要匿喺士多房」，老公丁子高日日囉唆又緊張，都是為千嬅生仔養身鋪路，看似基本生活自由被剝奪，但其實千嬅勁buy，有個體貼老公不知幾開心。
撰文：張俊銘
楊千嬅於11月在九展舉行3場被她喻為小經典的演出《MiriamYeungMinorClassicsLive》，現正密鑼緊鼓籌備，千嬅表示想做一個不似在紅館舉行的演唱會，這次純粹為一個回憶。千嬅原先考慮在演藝學院開騷，但最終因沒有場地，要改在StarHall舉行，她堅持要做得有水準，希望做出小經典感覺，選歌以非主流歌曲為主。千嬅強調今次不會找老公上台，她指老公丁子高亦不恨上台，又指丁生上台太緊張，到場支持她已經很高興，千嬅坦言：「其實佢唔聽我啲嘢，佢以前唔聽我啲歌，結婚後好啲，有時要做推廣，要了解我啲作品，咁樣有好有唔好，我唔需要伴侶假崇拜我，因為佢客觀，同埋佢成日講話自己唱歌好過我，同佢講我啲歌都嘥氣。」千嬅透露，會聘請一個舞蹈老師教自己走路，她說：「我行路似紀律部隊，老公對我有微言，我行路極之衰，老公話行路要有女人嘅姿態，我打算學啲身體語言表達，令視覺較果好啲。」
婚後首戒玩即興
千嬅完成3場演唱會後，再拍兩部電影，才完成今年的工作，對於近兩年不斷被提問何時造人，千嬅說：「家啲職業婦女，冇人特登放假去搞，我覺得唔關事，好似我助手，突然鬼祟打電話同我講話有咗，其實唔需要停低去造人，個人relax機會率會高好多。」
婚後享受家庭生活多於工作的千嬅承認，現在傾向減產，她說：「如果唔想有家庭溫暖都唔會結婚，家盡量同家人食飯，盡量星期六、日可以家庭樂，生活節奏有個譜。」千嬅回想未婚時，在上海工作完畢，隨意逗留兩、三日吃喝玩樂，現在有家庭，這些即興的行為隨之消失。生活習慣改變，雖然以前沒有試過同居，但幸好有適應期，因為兩人經常要出埠工作，大家經常不在香港，新婚時不用立刻消化大家的生活節奏。
老公逼早睡早起
生活起了變化，莫過於枕邊多了一個返朝9晚5的正常人，千嬅說：「老公好早起身，係佢令我都會早啲起身食早餐，喺娛樂圈嘅藝人，除非開早或者要影嘢，否則對我哋嚟講佢嘅時間真係太早，喺呢行如果我一早叫人去食早餐，人哋一定以為我有病，一係以為我做錯嘢要同人道歉，我係從來唔會食早餐開會㗎，呢樣最受老公影響，家早瞓已經好得人驚，以前我朝早6點先瞓，家12點幾已經熄晒燈，上網都會俾人鬧，我開住電腦，佢話你唔使返工我要呀！逼我瞓覺，不過家真係健康咗。」雖然口口聲聲話俾人逼瞓覺，但千嬅都認同養好身體，可以對日後生小朋友作好準備，她說：「老公話我生之前已經捱壞咗，所以家要補番吓，等個功能好番啲，佢話阿媽function唔好，過落去畀個小朋友都唔好。」
婚後千嬅要戒掉未嫁時很多習慣，總結對於老公的管束，千嬅說：「佢希望我養好身體，好好保養把聲，保持狀態係我自己嘅責任，所以佢成日都叮囑我，咁我都要接受，其實都係好事，唔可以唔承認健康養生係重要，都算係嫁到個好老公啦！」
監管過嚴曾想反抗
雖然千嬅心裏明白老公的善意，但一向獨立自主慣的她，都曾想過反抗，甚至想過找丁子高的錯處來反駁過份監管，誰知……
千嬅回想一次與朋友飯敍，朋友表示很久沒見先來敬一杯酒，怎料老公怒視朋友，眼神似要逼走對方，她雖明白老公不想自己太放縱，但自覺已改變不少，有時都想唞唞氣，千嬅說：「老公仲話最緊要唔好傷身，連消夜唔准我食。」要反抗便嘗試找出老公只說不做的破綻，怎料事與願違，她說：「佢不嬲唔飲凍嘢同汽水，我真係好驚，我真係冇見佢飲過凍嘢，30幾度，一齊去泰國，都要飲熱茶，佢頂多飲唔凍嘅橙汁，去馬爾代夫30幾40度，飲熱茶，火都嚟埋，佢話我都係咁飲啦！成個島冇冷氣仲要我陪你飲熱茶，飲完成個背脊濕晒！」
陽奉陰違偷飲冷飲
千嬅還理直氣壯承認會偷飲凍飲，卻經常被身邊同事踢爆放上微博。千嬅指奶奶經常相約朋友家中麻雀耍樂，屋企士多房放了大量汽水、果汁，用來招呼朋友，千嬅說：「奶奶好醒，會訂啲低糖少甜嘅飲品，有時好熱真係頂唔順就會匿埋士多房偷嘢飲。」千嬅透露，由於她有鼻敏感，擔心影響氣管，她在丁家生活兩年，屋企少開了冷氣，千嬅回想婚前，一年365日都要開冷氣，她說：「家最多只係恆溫，因為潮濕關係，婚前婚後最大改變就係注重咗養生，有個丁家療程跟住去做。」