由石詠莉（Sukie）、陳樂榣同甄穎珊組成嘅三人女子組合Freeze分開發展後，Sukie喺內地嘅發展算係唔錯，佢單飛後第一首推出嘅國語歌《極樂》，即係電影《3D肉蒲團之極樂寶鑑》主題曲，喺內地播咗短短兩個禮拜，已經榮登上內地Sina榜第三名，第一、二名都係日本樂壇大姐大濱崎步嘅歌曲。
衝上台拉扯
Sukie嘅新歌能夠緊貼步姐之後，希望佢可以慢慢洗底，以前Freeze成日俾人叫「整容三嬌」，每日出嚟都一定要賣肉騷身材，佢哋要洗底真係幾難。家陣總算叫做有啲成績，點知馮仁昭就聽聞Sukie前幾日去咗東莞一間酒吧登台時遇到麻煩，據知佢唱唱吓歌，其中有個飲到醉醺醺，操鄉音嘅男酒客大聲喝令Sukie：「脫衣！」Sukie當時扮聽唔到，繼續唱歌，呢位醉客見佢冇反應，直情衝上台拉佢落台，全場十幾個保安即衝上台將鬧事酒客制服，將佢拖離場兼預備報公安，最後係Sukie話唔追究至放佢一馬。