香港球迷有福了，事關NBA巨星將會去澳門打表演賽！封館未解決，等錢使、冇嘢做嘅巨星們，包括湖人後衞拜恩、熱火「三頭犬」勒邦占士、獲迪、保殊、「紐約雙雄」安東尼、A史杜達米亞及「新世代」控衞公牛戴歷路斯及黃蜂基斯保羅等，已計劃喺本月底至下月9日，進行6場環球巡迴表演！
拜恩領軍 熱火3子都嚟
NBA封館超過3個月，周三勞資雙方進行了超過8小時會談後，仍然未達成任何共識，雙方周四會繼續商討。工會與NBA當局繼續談判，精力充沛嘅NBA球員，總唔能夠一直咁dry冇波打，所以喺亞特蘭大生意人達登（CalvinDarden）提議，再經3個月嘅穿針引線下，終於獲得超過14名巨星級球員嘅經理人同意舉行表演賽；暫定會喺波多黎各、倫敦、澳洲同埋澳門，進行共6場嘅表演賽，其中澳洲同倫敦就會打兩場。
雖然有傳勞資雙方最快會喺周四傾掂數，不過應該都唔會阻止到呢班Superstar嘅「環球搵銀騷」，皆因聯盟早前已取消咗頭兩周賽程，而勒邦占士亦早早爆料話會聯同其他球星到美國以外地方打表演賽，結果落實喺本月30日至下月9日舉行。據講每位參加表演賽嘅球員，每人都會有六位數至100萬美元嘅收入，而部份收益亦會撥捐慈善用途。
港澳勢掀撲飛潮
除咗雷霆杜蘭特、塞爾特人加尼特等未落實參加外，大牌球星入面只有懷特侯活嚟唔到，咁嘅陣容直頭係「夢幻隊」，到時肯定掀起撲飛潮。而喺澳門嘅比賽場地，最大可能當然係威尼斯人嘅金光綜藝館，皆因ESPN講過，表演賽嘅場館最少要容納到超過15,000人，綜藝館絕對符合要求，而美國隊喺08京奧時，都喺度練過波。封館搞到球迷囉囉攣，今次都算係因禍得福，有個千載難逢嘅睇星機會，香港球迷唔好錯過啦！聽威尼斯人公關講，至噚日為止仲未收到有關主辦NBA球星表演賽嘅消息。威尼斯人最近一個體育比賽，係下月29日開波嘅澳門羽毛球公開黃金大獎賽。
NBA「明星隊」表演賽知多啲
日期：30/10-09/11
地點：澳門（1場）、波多黎各（1場）、倫敦（2場）、澳洲（2場）
表演賽：共6場