陳茵媺（Aimee）前日去完中環出席活動之後，喺4點幾就去咗附近行街，佢先喺連卡佛揀鞋。蜜運中嘅女仔唔單止特別靚，而且仲好和藹可親，當記者走埋去問佢拍拖開唔開心時，佢都有問必答，仲笑到好甜咁話：「OK啦！做嘢都好開心。」面對近日心廣體胖嘅男朋友陳豪，Aimee就錫住男友話唔算係好肥，而且近日男友要趕戲應該都會好辛苦，至於會唔會錫番佢，陳茵媺就話：「OK啦！有呀，佢都好好。」面對近日挖角潮，陳茵媺就即刻打起精神向TVB表忠，佢話：「我會一直留喺TVB，同公司合作好開心，而且我嘅合約仲有好耐。」之後就拎住戰利品行去攞車走人。
熊黛林揀冷衫
另外，大約6點鐘就見到熊黛林（Lynn）着住T恤牛仔褲戴副黑超現身H&M，同平時喺天橋千嬌百媚嘅感覺完全唔同，見佢一邊揀冷衫一邊講電話不知傾得幾開心，睇嚟男友郭富城應該就快有新衫着。買完衫之後阿Lynn碰到兩個朋友，寒暄咗一陣佢就攞車離開。