阿里巴巴集團主席馬雲日前先至由美國飛返內地，處理淘寶商城危機，噚日又嚟咗香港出席論壇。華華見佢都算精神，無之前媒體形容咁「謝」，可能淘寶商城事件暫時平息。不過，唔知係咪之前激嬲班商戶，所以噚日趁機幫淘寶賣吓廣告，馬雲話自己閒來都鍾意上網淘寶，講講下仲指住自己對鞋話喺淘寶淘返嚟嘅。
華華唔係睇得好清楚，大概見到係對疑似功夫鞋嘅黑布鞋，馬雲話對鞋係由內地鄉郊工人做，雖然只賣廿幾蚊人仔，但非常舒服。呢啲咪叫平、靚、正囉！
成功人士永遠唔會畀自己停落嚟，搞掂完淘寶商城單嘢，馬雲呢排應該忙緊收購雅虎。話說噚日個論壇楊致遠都有到，只可惜馬雲同佢前後腳到場，否則可以即場傾埋生意。