今年民企經常俾人玩針對，一有咩風吹草動就俾空軍沽，而且分分鐘又俾人唱衰，兼降埋評級。
好似由前女首富張茵打骰嘅玖龍紙業（2689），今年中無啦啦俾標普撤回評級，雖則最後乜事都冇發生過，但玖紙都係唔爭氣，全年業績差到無倫，負債返番去海嘯水平，所以唔俾人沽就奇啦！
薪酬勁加三成
不過，其實公司股價同業績表現，從來都唔會同管理層份糧掛鈎。
所以噚日睇到玖紙新鮮出爐年報，董事長張茵去年度薪酬勁加三成，達5566萬人仔。
雖然張茵冇好似對上一年咁收40萬人仔津貼、44.8萬人仔酌情獎金，但2011年度（至6月底止）單係董事袍金就加咗74%，由原本235萬人仔，加到409.5萬人仔。
另外，張茵仲首次「正式」收薪金，由以往「零人工」，到今年收147.1萬人仔薪金。所以就算冇咗2010年度嗰108萬購股權，今次淨係收份糧，都已經收凸喇。
老公大仔減薪
嗱，唔係個個執董都有人工加㗎，就好似張茵老公劉名中咁，整體薪酬就減咗7%，至516.8萬人仔。至於大仔劉晉嵩亦減咗薪5%，最後得番148.6萬人仔。
李華華
mailto:[email protected]