「茅躉王」沙維治（RobbieSavage）再度現身球場，不過唔再係身穿足球戰衣，而係着上舞衣。呢位今年5月正式退休嘅前打比郡隊長，周二喺生日嘅時候，喺英冠聯賽打比郡作客2:2賽和雷丁嘅中場休息時間，同美女舞者OlaJordan大跳Tango（探戈），「壽星公」跳舞娛賓，睇得球迷如癡如醉！
周二滿37歲生日嘅沙維治，綽號「Mr.Marmite」，呢個係英國傳統醬料品牌，人們對醬料味道「唔愛就恨」，用嚟形容佢踢波風格最適合，皆因佢喺英超生涯累積達89張黃牌（只曾兩次紅牌被逐），被英傳媒譽為「茅躉王」、「殺人王」，隊友自然深愛佢，敵隊就對佢恨之入骨。
跳到上BBC真人騷
呢位「茅躉王」退休後亦都繼續挑戰自己，接受英國BBC電視台邀請，化身舞者喺真人騷節目《StrictlyComeDancing》跳舞比賽。節目喺上月底已經播出，同專業舞蹈名家OlaJordan拍檔嘅沙維治仍然未Out，佢話跳舞對佢嚟講真係好難，每日都要練足10粒鐘，真係人都癲！
鍛煉得咁辛苦，沙維治自然要show吓實力。咁啱佢周二生日時打比郡作客雷丁，呢個對碰組合亦係沙維治退休前最後一戰，所以今次能夠喺度以跳舞慶祝生日，真係別具意義！當兩軍半場踢成0:0中場休息時，主持人介紹沙維治同partner出場，即時令全場球迷尖叫。
雷丁最後和打比郡2:2
音樂重新調節後，沙維治在米底捷斯基球場超過15,000名球迷面前跳Tango，睇佢跳得似模似樣，舞姿仲令雷丁隻7呎高嘅吉祥物京士利（KingsleyRoyal）捉住工作人員喺場邊跳一份，真係搞笑！打比郡雖有前隊長沙維治落力跳舞「打氣」，但球隊最終都係賽和2:2，現12戰得21分居聯賽第4，5分落後榜首嘅修咸頓。
