近期小朋友流行口噏噏哼住：「戇戇居居去買麪，買着個蝦子麪！」唱到街知巷聞的福祿壽王祖藍、阮兆祥和李思捷也感到驚訝。祖藍與祥仔笑言要踩過界做小朋友節目，怎料李思捷聽到後即表示要慎重考慮。祥仔表示福祿壽曾連續三日冇阿姐靚湯飲，後來才戇居居醒覺自己激嬲了她。
王祖藍、阮兆祥和李思捷憑扮嘢才華跟搞笑天份組成「福祿壽」，去年聯同汪明荃（阿姐）主持《荃加福祿壽》從綜藝節目做起，先後舉行演唱會及拍成電視劇《荃加福祿壽探案》，成為電視台近年最成功的組合，劇集插曲《戇戇居居去買麪》更令小朋友琅琅上口。
想做兒童節目
祖藍與祥仔有見及此，覺得要做埋小朋友節目，可惜李思捷面色一沉說：「諗吓先，諗清楚先做。」在旁的祖藍與祥仔即爆笑拍打思捷說：「咁又係，小朋友，你又係要諗清楚先做，我哋唔敢講咁多。」
日前有傳福祿壽拍劇時得罪阿姐，李思捷透露只是期間有三日大家沒有湯水飲，但又不敢去八卦發生甚麼事，祥仔說：「原來係我激嬲阿姐，我同佢道歉，阿姐大人有大量，第四日就有湯飲。」他又笑說：「阿姐問我兩條問題，問我係咪細路，我話係。再問我識唔識世界，我話唔識，阿姐話好啦，細路仔唔識世界。」
明年紅館開騷
祥仔懷疑自己平日快言快語激嬲阿姐也不知，總之是他的錯，不用去查問究竟，道歉便可。
福祿壽暫定明年2月再踏紅館舞台開騷，問到阿姐不參與是否因為被祥仔激嬲一事？祥仔說：「唔係，我哋一計劃就問阿姐，佢話農曆新年唔喺香港，加上明年有自己計劃，暫時唔想重複再做經已做過嘅嘢。」
對於年底電視台頒獎禮，福祿壽明言不着重獎項，最緊要是參與能令頒獎禮更好看更多元化。祖藍覺得福祿壽令他知名度提升，增加在外的工作量，收入也同樣增加，這已經是最好的回報。
採訪：馬建華
攝影：黃偉雄