上個禮拜，花旗同野村不約而同出報告，話呂志和旗下嘅銀河娛樂（027）市場佔有率直逼賭王何鴻燊旗下嘅澳博（880）。可能呂志和真係想一登賭王寶座，所以新招陸續嚟，自從「澳門銀河」5月開幕之後，入面嘅悅榕莊Spa、食肆陸續開業，最新搞作係3D戲院。
呢間係澳門首間3D戲院，由澳門銀河同UA院線合作，入面有貴賓影院同傳統影院各4間，仲有間有樓座嘅大劇院，9間影院合共提供1000個座位。大劇院仲設有獨立玻璃廂房，公關話，個場勝在夠大，設施適合舉行首映，據聞大導演徐克已經搶咗頭啖湯，新戲《龍門飛甲》首映將會喺嗰度舉行。
澳門銀河開幕5個多月以嚟，不停出招吸客，刺激銀娛股價去年底至今升咗七成，唔知今次賭王會唔會又出送叉燒飯呢招迎戰呢？