周三水原藍翼主場對艾薩德嘅亞冠盃4強首回合比賽，出現咗兩個爆；第一個係爆冷個爆，事關艾薩德憑前馬賽射手尼安梅開二度，作客贏2:0，爆出8倍客W同50倍波膽。
另一個爆係火爆個爆，比賽踢到下半場尾段，雙方發生群毆事件，十幾人互相追打，客軍後備艾希密特更加「爆晒缸」；球證結果分別判水原藍翼嘅前鋒拿斯迪，同埋艾薩德嘅卡達基達紅牌離場；因為事件擾攘好耐，補時足足要成10分鐘，期間尼安又因拖延時間，畀球證趕埋出場，令全場總共有3面紅牌，不過戰果就冇改變。表面上水原藍翼少一個紅牌，次回合好似着數啲，但拿斯迪係球隊聯賽次席射手，首回合已經輸兩球，下星期嘅次回合拿斯迪停埋賽，要收服失地真係唔易。