金融市場風起雲湧，國際監管要求又海鮮價日日新，金管局作為銀行監督嘅掌門人，呢幾年睇怕做到氣咳，難怪退休嘆世界嘅磁力越嚟越大。華華聽聞，兩位分別隸屬銀行政策及銀行監理部嘅資深主管，近月來先後退休或離職。
啱啱上月底退休嘅，乃該局前銀行政策主管陸小雯（Rose），外表一啲都唔似步入嘆長糧之齡嘅Rose姐，同傳媒接觸唔多，對上一次要追溯到6月，伊人代表金管局出席完巴塞爾相關會議後，講解巴三對銀行流動性及資本最新要求。
另一位比Rose姐更早離職嘅主管，就係金管局前銀行監理主管梁信彥（Danny），佢有超過十年工作經驗，Danny未屆退休之齡，有說佢今後會逍遙嘆世界，但亦有說，佢過完冷河後會投身私營機構。根據規定，該局屬高級經理或以上職級員工，重出江湖前嘅冷河期，最少6個月。