呢期潮玩公路單車！晨早見人踩車返工赤柱出中環，半夜又見油尖旺公路單車群。唔好以為跳上乜嘢單車都可變車神，今日請嚟前港隊代表兼野牛單車顧問鄧宏業教大家出車，想試極速傳說，手把闊度以至座位高低都要計過度過！
記者：朱崇德
攝影：楊錦文
Model：Waye@GME
野牛單車（23684000）
TakeAGlance
四輪馬車變兩轆單車
講單車歷史，估唔到又扯到「達文西密碼」！1766年，當一群修士修復達文西手稿時，竟發現最早腳踏車雛形圖（1490年），不過同飛碟一樣，只係紙上談兵。實牙實齒幾時先有？咁就一定要識法國人西夫拉克（ComteMededeSivrac）！一個下雨天，佢Hea街時俾一架路經嘅四輪馬車濺到一身泥，於是佢好兇狠咁諗：四輪馬車咁闊真係把鬼，如果將佢切開一半，四個轆變成前後兩個轆……於是1791年第一架「木輪」小車就咁獻世！前後兩個輪，中間連住橫樑，上面一條板凳，呢架既無傳動鏈亦無轉向裝置嘅車，就被認定係人類最早嘅腳踏車嘞。
最Fit要搵電腦計
今日教大家Tune車嘅鄧宏業係前港隊代表，分別喺2007及2009年取得UCI2.2環南中國海公路車大賽，以及東亞運動會公路單車賽呢兩項賽事嘅金牌同總冠軍！問阿業校車心得，佢面有難色：「BikeFitting需要好多專業工具，例如紅外線平水儀、數碼座鞍平水尺、量角器、訓練台同DartfishProsuite動態分析系統等；人人體格、身體柔軟度不同，更須量度身體數據，經電腦分析先可取得最佳單車設計藍本，從而達致最佳肢體角度、減少風阻及最有力的踩踏效果！」野牛單車BikeFitting服務由業餘級（$200）到專業級（$2,500），豐儉由人。
簡單Set車基準
踩車只屬業餘，揀車唔想玩到「精算學」，一樣有簡單準則！原來，買單車如買衫褲有碼分，主要以身高等數據釐定，不過不同車架廠有不同運算方法，最好度好身再向店員查詢就實無錯。
1 座高 腳要微曲
牛糞飛踩車座位有咁低得咁低，最好膝頭下下頂心口，不過咁樣好傷膝及腰關節！正確體位為前腳掌趾骨位踩腳踏，向下踩至七點鐘位置時（圖中左腳），膝蓋（左膝）仍能保持微曲就代表啱啱好！
2 手把 等同肩闊
手把闊度應相當於車手的肩膀闊度或+2cm，如窄於肩膀會令操控不平穩，過闊則唔就手，揸得耐好易攰。
3 車胎 首選700C
現時公路單車，男子組車輪規格700C，女子組650C，前者車輪直徑約為622mm，後者為580mm。假如身形夠高大，不分男女都建議買700C，因為配件相對較多，改車時你就知幾方便。
4 頭管 越低越好
設定頭管（HeadTube）係兩難局面，Set得越低風阻越低，速度相對較快，前提係身體柔軟度要夠，彎腰手掌掂到地，恭喜你，頭管可以維持原裝最低！只係摸到小腿？加三至四個RingSet高佢，踩起嚟Feel到背部有輕微拉緊感覺為之Fit。
5 Seat位 越細越快
嚴格講單車Seat位並唔係用嚟坐，「籮柚」只可輕輕掂住，坐死喺度雙腳就唔可以做到「直踩」發力！越窄越薄越有利於腿部發力，不過盆骨大者，用中或闊設計就梗係舒適好多。
防護出車4寶
頭盔、手套、太陽眼鏡及單車鞋為最基本安全設備，公路單車業餘速度都可達35km/h，唔戴護具真係幾危險。
摺車推介
StridaLT$4,100
現時最流行摺車款！收藏極細，外形勁潮，多色選擇，裝拆只需一、兩個Step，為女車迷最愛！
DahonBullHead$6,980
唔講你會知佢係摺車嗎？使用隱藏「狗牙式」摺位，再加六角螺絲鎖緊，結構上剛性極強，重磅車手救星！
跑車推介
CerveloS5Team$68,000
車架「水滴形」設計，向前部份呈圓弧，後部薄刀狀，有破風及理順風尾湍流作用。
PinarelloLungavita$9,980
懷舊精神不死！誇張形牛角，墨綠車身撞白轆，Classic到玩「無波轉」，《少年十五二十時》賈思樂好似揸過喎！
