華潤集團主席宋林（圖），4月底東山復出接替過檔中旅集團嘅王帥廷，重掌華潤電力（836）帥印，不過只係做咗半年又易帥，由華潤水泥（1313）前主席周俊卿接棒。潤電15個月內換咗3位主席，速度拍得住電影換畫。
宋林會返去集團處理業務，查實佢6月時已經講咗，執掌潤電純粹過渡性質，仲話「不會很久」，空降只因潤電班子仍然年輕，所以暫時做住保母，等接班人成長。佢當時簽咗3年合約湊大潤電，點知咁快就搵到人接班，宋林可以專心睇返住集團業務。
至於新任主席周俊卿，83年起擔任華潤水泥執行董事，08年坐上潤泥主席個位，今次過檔做潤電主席，雖然唔知會做幾耐，但希望潤電班管理層快啲成長，咁就唔使再成日換主席喇。