公民今年進駐旺角大球場為主場，球隊噚日踩場拜神切金豬，祈求事事順利。眼見另一支以呢個旺丁場為主場嘅晨曦，頭炮對深水埗吸引咗近4,500名球迷入場咁墟冚，公民都決定搞搞新意思！
本身已經有Honey等幾位足球寶貝嘅公民，噚日除咗宣佈有吉祥物鳳凰Amigo（圖左）登場外，藝人范振鋒同Naomi（圖右）亦會分別出任球會宣傳大使同球迷會經理。曾經到台灣做Model嘅Naomi仲透露會同球迷打成一片︰「每逢我哋有比賽或活動，我都會親自打電話提大家。」
公民喺旺角場第一擊，將會喺聽晚8點鬥和富大埔。球迷只要即場加入球迷會，就可以200蚊、比正價平50蚊入會；即時可獲球隊特刊外，之後仲可以免費睇晒公民所有主場賽事，包括盃賽同亞協盃。