原來會生金蛋嘅唔一定係雞，呢隻鳥都識生，佢叫「憤怒鳥」。就係全靠呢隻「憤怒鳥」，遊戲開發商Rovio已經部署緊上市計劃。
合拓中國功能手機市場
想黐金糠嘅人大把，包括第一視頻（082）。噚日第一視頻宣佈，同Rovio合作，進軍中國功能手機（FeaturePhone）終端市場。
截至今年9月，全球超過9億人次下載咗「憤怒鳥」，幾乎係每部SmartPhone必裝嘅遊戲。不過，據易觀國際統計，中國家陣10億手機用戶當中，唔係用SmartPhone嘅市佔率達86.2%，如果令到佢哋有得玩「憤怒鳥」，咁就和味！
內地市場咁大塊肥肉，Rovio冇理由唔食，第一視頻董事主席張力軍話，旗下嘅中國手游娛樂集團CMGE，截至3月佔內地手機遊戲市場18%，今次合作會獲得「憤怒鳥」中國非智能手機版開發權，預計明年1月推出，到時國內非智能手機，甚至「山寨機」都有得玩。發達！