林海峰（Jan）棟篤笑騷前晚開鑼，鄭秀文（Sammi）單拖睇騷，阿Jan笑指希望觀眾在有生之年可看到Sammi和許志安咀嘴，他又把郭富城比喻為樓底唔高、樓齡又唔新的筍盤。雖有老婆彭羚撐場，但經驗十足的Jan三度忘詞發台瘟，老貓燒鬚。
一連六場的「玩上身林海峰是但噏我好驚」棟篤笑騷前晚在紅館舉行，Jan的老婆彭羚（Cass）和鄭秀文搭膊頭入場，不過未見許志安；袁詠儀和張智霖、陳奕迅和俞琤等亦有捧場。Jan開場部份以棟篤笑為主，之後他連同好拍檔葛民輝及草蜢一同演出，載歌載舞，蔡一傑還晒胸肌搶鏡。
講有味笑話
經驗十足的Jan前晚三度發台瘟忘記台詞，導致deadair，他不好意思反問觀眾：「我講到去邊度？」接着他又重複之前的台詞。他又擺Sammi和安仔戀情上枱，他說：「佢哋93年到家fans先見到佢哋拖手，希望喺觀眾在生前可以見到佢哋初吻。」Jan請三位fans上台玩，阿葛向fans講有味笑話，他說：「我可以幫你改運，但有少少痛，唔使驚。」Jan重提熱爆小學生鬧老竇片段說：「我畀20蚊你，返去你老竇個啷啷度。」
Jan又以筍盤形容古天樂、劉德華和郭富城，他說：「華仔梗係筍盤，不過佢個大馬業主有時好似喺度，有時又好似唔喺。至於城城，佢嘅樓底唔算高，樓齡唔算新，不過keep得好好，但亦都已經俾個內地女仔做咗首次置業上咗車。」
Jan表示開騷前有問朋友意見鍾意他講甚麼題材，他發現不少人都喜歡他講家人和家事，說畢Jan即在台上倒立，他解釋：「因為我次次問親細女，佢都會做倒立。」接着Jan扮Cass在家中做瑜伽，他瞓地趷起patpat，相當搞笑。
樂意被偷拍
完騷後，Jan接受訪問時被問到發台瘟，他卻反問：「有咩？不過我年紀大，44歲又有白頭髮，台上有雜音，又要顧住觀眾，冇人提我㗎，一唔記得我就游咗出大海。」不過有時觀眾反應未算熱烈，Jan聲稱可能因星期一要返工的關係，對於有觀眾以手機偷拍，他笑言：「冇人拍我先驚。」
採訪：張俊銘 攝影：林德雄