牛津大學出版社香港分社慶祝五十年紀念，請來牛津大學校監彭定康來港主持慶祝酒會，順便推銷牛津新書。酒會在十月二十六日黃昏於金鐘萬豪酒店舉行，離開新政府總部添馬艦所在地好近啫噃，特區行政長官曾蔭權嘅任期已進入倒數階段，有冇興趣移吓玉步，到萬豪酒店與最後一任港督飲番杯呀？或者邀請彭定康到新行政長官辦公室行一行，等彭定康見識吓新政府總部有幾威？
彭定康是牛津校監，不是牛津學者，要聽吓牛津名牌教授講中國文化，不妨明天（十月二十日）到中大聽吓牛津大學之中國藝術與考古教授羅森爵士（ProfessorDameJessicaRawson）演講「華夏與中亞——中國的異域文化——公元六至八世紀」（ChinaandCentralAsia–ExoticisminChina–SixthtoEighthCenturyBC）。羅森爵士係到中文大學主持中國文化研究所莫慶堯學術講座嘅，呢位女教授曾任牛津大學副校長，大英博物館東方古器物部主任、2002年封爵，中國社會科學院考古研究所古文明中心顧問，專門研究唐代銀器與陶瓷器之相互關係及古代紋飾設計之考釋，以及周朝至秦漢時期宗教與禮制之變化。
咁專門，以左丁山之孤陋寡聞，都唔知有邊位中國人、華裔學者對以上各題目有專門研究，要問吓董社長先至會有答案。不過唔好以為呢類大教授一定講得好學術好專門，令普通聽眾發悶噃。左丁山有一次到中大聽一位鄧博士講客家人風俗文化，佢淨係講客家女人在田野間戴上嗰頂帽，已講咗幾十分鐘，各位在場人士都聽到津津有味，不願離開。有一兩位人士仲話退休後要到中大跟佢讀番個碩士學位㖭。人老咗，原來鍾意研究歷史，追尋舊事物，黃遠輝讀過考古，吳明林返中大讀比較歷史碩士，讀到幾乎唔捨得畢業，難怪呢個比較歷史碩士課程大受歡迎，報讀人數遠超每年學額，而報讀人士又以退休人士更為踴躍，唔怪得兩位退休銀行財務界人士區慕彰與羅文華取得理工大學博士學位後，合力出版一本「中國銀行業發展史──由晚清至當下」，好有趣味性。一講歷史，我地不可只知遠，不知近，今晚沙田馬場泥地馬有第七場荃灣金禧盃，第三班跑一千二百米，就係紀念荃灣成為全港第一個衞星城市！