俗語話「新官上任三把火」，新上任英冠諾定咸森林領隊嘅葛達利（SteveCotterill）周一下令，禁止所有球員玩社交網站，唔准佢哋喺twitter同facebook提及或評論有關球會嘅事；只要有球員違規就會被罰款，留言會逐個詞計、每個詞罰1,000鎊（約12,200港元）！葛達利呢招擺明抄英超紐卡素「肥佬班主」艾殊利嘅辣招，但係咪真係有效，就要拭目以待啦！
森林今季成績差勁，11戰僅2勝2和7負得8分，現居英冠尾2（未計周二戰果）。球隊上星期換領隊，由英籍領隊葛達利代替早前離隊嘅麥卡倫，呢位前樸茨茅夫領隊講明要實行鐵腕政策。首先就係要球員「收聲」，唔准球員喺twitter或facebook講球隊嘅嘢，實行要做到上下一心，幫助球隊脫離降班漩渦。
留言逐個詞罰萬二蚊
47歲嘅葛達利話：「我喺樸茅執教時，已下令球員唔准用twitter或facebook講球隊嘅嘢。球員違規，一個詞罰款1,000鎊！如果有人寫咗一段，嗰段有20個詞，就要罰兩萬鎊！我唔期望會有咁嘅情況出現。」不過，前鋒伊斯美米拿喺森林上周六聯賽作客負高雲地利0:1後，喺twitter留咗「fxxkoff」等句子達20個詞，葛達利就話呢次算數，唔罰佢逾兩萬鎊罰款，但再犯就唔再放過喎！
查實禁用twitter或facebook，主要係想排除所有批評聲音，令球隊達致上下一心；今季英超神奇「喜鵲」紐卡素都實行緊，暫時8戰4勝4和得16分排英超第4，同曼城、曼聯一樣係不敗之師。
諗番起今個夏天，喜鵲肥佬班主艾殊利放走主力路蘭，荷西安歷基、祖爾巴頓都透過twitter鬧球隊冇鬥心，激到艾殊利掃走佢哋；當時外界批評艾殊利係「孤寒班主」，點知隊波家成績咁好，難怪森林要抄橋啦！