女子組合2R家姐Rosanne（黃婉君）同妹妹Race（黃婉佩）家陣各有各精采，家姐嫁畀混血牙醫Derek後，今年四月生咗囝囝白迅（Dylan），一家三口樂融融；29歲嘅細妹Race同中國星太子爺向佐蜜運後亦淡出幕前，轉行喺金英證券做公關，仲學做股票經紀。
最緊要開心
噚日Race現身銅鑼灣出席公司嘅開幕活動，除咗請嚟家姐帶埋六個月大嘅Dylan撐場外，未來奶奶陳嵐亦應邀任剪綵嘉賓。問Race會唔會搵家姐同向佐開戶投資？佢話：「我都未考到牌，希望一年後可以。家讀緊商科碩士，男友都好支持。」咁婚期咪要延遲？Race就話：「未有計劃結婚，大家都以事業為重，最緊要開心。」至於小Dylan則首度曝光，身穿Burberry格仔潮服，眼仔睩睩，好鬼可愛。談到復出，Rosanne話：「有工作可以接，時間唔可以太長，因為仲餵緊人奶，以囝囝行先。」