法國後衞加拿斯（左二）由09年做阿仙奴隊長，到10年被踢出隊，至轉投兵工廠死敵熱刺，仍不時講舊會嘅壞話，不過似乎時間會冲淡怨恨；周日阿仙奴主場對新特蘭，佢同另一舊將皮利斯（右），由傷兵沙格拿帶路重返阿聯酋球場睇波，仲同阿仙奴吉祥物合照，睇嚟加拿斯已經同舊會破冰嘞。另外，長期養傷嘅華美倫周二同兵工廠續約至2015年，對球隊嚟講亦係喜訊。