XB360《ForzaMotorsport》咁多集，一直緊貼PS3《GT》系列，務求躋身龍頭車Game地位。今勻新作除大量靚車任你舞，更大玩U形軚盤，融合Kinect操作，雙手隔空扭吓擰吓就可操控愛驅，連軚盤錢都慳番！
記者：韓繼聰
攝影：陳盛臣
Model：Ceci@InterplayWorkshop
兩種玩法踢走軚盤
賽車遊戲最講求是真實感，機迷始終認為用番軚盤控制，先至有車Game味道。為配合《Forza4》，XB360先推出全新無線軚盤，設計簡單輕巧，仿似一碌U形棍，且不設底座，拎上手就玩得，夠方便。落場試車，無線軚盤操控感相當不俗，內置動作偵測功能，令每個操控指令都咁細膩精準，唔會出現轉向唔靈活嘅弊病，基本上一玩已可上手，毋須花時間適應力度問題。唯一要挑剔的，就是沒有底座，少了一些阻力和搶軚手感，而且只靠按掣作加減速，到真正賽車軚盤始終兩回事。講到最Free，一定係配合Kinect玩法，除可感應你頭部轉向，讓你好似揸真車咁不時望盲點住敵車，雙手更可憑空營造一個虛擬軚盤，扭吓擰吓就可轉彎，不過加減速全由電腦幫你控制，欠缺賽車Game最着重嘅BrakePoint技巧，較適合初哥閒來一償揸靚跑嘅心願。
《TopGear》主持講名車
試完車，睇到精美得如同真實的畫面，當然令人興奮。但除咗駕駛樂趣，相信真正的車迷亦希望可以親身「接觸」吓自己的DreamCar。同樣利用Kinect，玩家就可以對來自超過80間車廠的名驅慢慢「搜身」。無論你想開車頭蓋睇引擎，定係開車門入內櫳，只要伸吓手、郁吓身就得，非常過癮！而你更可聽到《TopGear》名主持JeremyClarkson，同你解構各部Parts，愛車之人一定Like爆！講起《TopGear》，遊戲更收錄咗節目中出現過的挑戰和測試賽道，俾你一試身手。
除基本的網上對戰，亦新增「俱樂部模式」，俾你上網搵Friends組織車會，得閒鍊車鬥排名外，亦可分享你嘅私家改裝靚車，俾人試吓你部愛驅改得有幾勁！而網上對戰就最多支援16人齊齊落場，感覺超爽！
主機：XB360
開發商：Turn10Studios
人數：1-2人（最多16人網戰）
售價：$329（淨遊戲）$399（淨無線軚盤）$629（遊戲連無線軚盤）