旺角大球場前日重開，首戰晨曦對深水埗已經吸引到4,499位球迷入場；嚟緊呢個禮拜，原本旺角場淨得公民對大埔（周五）同晨曦對標準流浪（周六）兩場波，不過原本周六喺九龍灣上演嘅港菁對南華，得到晨曦同意後，會改喺旺角場上演，仲要踢頭場兩點半，足總網頁噚日就確認呢次變動。南華同港菁改場踢唔會分到門票收益，搞咁多嘢，都係想飲迫爆旺角場嘅頭啖湯啫！
晨曦唔介意南華踢頭場
以九龍灣公園做主場嘅港菁，周六將會主場對南華，客隊南華就擔心個場得1,200個座位，恐防fans望門輕嘆，提議改喺小西灣踢，但最後「空降」旺角場；求大俠就呢件事問南華足主羅傑承，佢話呢個主意喺港菁提出，原因係對方見旺角場咁熱辣辣，想食住個勢，所以佢哋就同晨曦建議搬場。晨曦見有南華踢頭場，肯定吸到唔少擁南躉入場，亦唔介意畀多少少行政費，喺大家都同意下，今個禮拜六嘅旺角場就拍板上演「雙料娛樂」啦。
「港南戰」改嚟改去，最後搬到旺角場，足總已經租晒兩場，仲要印埋波飛，咁呢筆達5位數字嘅行政費，邊個孭呢，我求大俠就搵唔到有人肯公開認頭！而羅生亦快過足總一步，前晚已經喺南華blog率先爆料。佢仲話今季首次旺角場「雙料娛樂」有機會坐爆6,664個座位，想入場嘅球迷記得留意足總預售公佈。
今次「港南戰」改喺旺角場踢，對球迷、球會同球市嚟講，可以話係齊贏之局。我求大俠只係擔心足總講明行主客制，家陣幾隊傾掂數，使少少錢就可以轉場地又改場次，外界以為足總冇乜準則，好易引起誤會囉！