2011亞洲先生競選昨日舉行第一輪面試，25位參賽者驚爆登場，本地薑質素騎呢兼平庸，即時吸引半數內地高質素男士參賽，當中晒命富二代塗諾更揸林寶堅尼到場，認真架勢，加上靚仔國家隊游水運動員，內地組擺明贏本地組幾個馬鼻。
今年2011亞洲先生競選昨日在大埔亞視總台舉行首輪面試，主題是「尋找亞洲超級男」，比賽於12月舉行，昨日擔任面試評判有宮雪花、朱慧珊及呂晶晶等，宮雪花更大讚參賽者質素好，稍後見他們穿泳褲，個心會從胸口跳出來。
第一輪面試暫時有25位參賽者，由於參選資格不限年齡和國籍等，有不少來自內地的高質素富二代同胞參加，反而港產參賽者則明顯遜色。
來港做生意
「國產靚仔」有31歲來自深圳的晒命公子塗諾，他駕駛百萬黃色林寶堅尼到場攞晒威，穿透視衫的他被問是否富二代？他說：「屋企人做生意，唔知算唔算。」他自爆曾在深圳先生選舉奪冠，算是半個行內人，他在香港有生意是老闆，其母則是內地京劇演員燕妹，睇牌面已稍勝一籌。來自廣州的嫩口19歲溫先生也是筍盤，廣州飛魚的他肌肉結實，是國家游水隊運動員，他說：「我係嚟玩吓，家係大學生。」
「港產騎呢」方面，以揹住LV及小提琴到場的音樂阿叔「阿林」最出位，56歲的他是昨日面試者中年紀最大。
「潮流興矮」
問音樂阿叔有否信心？他說：「有，好多人70幾歲先參加健身比賽，我越老越成熟，內在美多啲，同埋潮流興矮，矮會長命啲。」他自言大中小提琴、鋼琴、單簧管及色士風等樂器都懂，職業是教小朋友音樂。林叔又說自己的幽默感和口花花是取勝地方，但叫他即場表演，他卻以怯場拒絕。
古箏必殺技
41歲的「留海」Alan也是一絕，身穿鮮黃短褲的他，影相時擺出nobody甫士，騎呢又搞笑，他謂不擔心年紀大會輸蝕，更說其必殺技是學了10多年的古箏，據面試評判的葉家寶透露他曾參加MrGay比賽，故現先可稱他為好色MrGay。33歲的阿Sam其貌不揚兼戇直，他自言優勝的地方是夠自信，身材也是優點之一，聲稱做了八年gym的他指自己有腹肌，似乎有點不可思議。
採訪：溫敏芝 攝影：林德雄