日本組合w-inds.前、昨兩晚於九展開騷，今次是三子相隔兩年後再來港演出，歌迷熱情不減，三子亦由頭到尾又唱又跳落力演出回報港迷。最搞笑是w-inds.不斷亂爆廣東話搞氣氛，又扮港人講電話，主音橘慶太更自認變態！
開hall賣紀念品
出道10年的w-inds.一直在港擁有大批歌迷，因此亦特地來港舉行10周年紀念演唱會與粉絲慶祝，令九展全場2,800個座位爆滿，大會特別開了一個hall賣扭蛋等紀念品，讓歌迷搶購。粉絲未開場已情緒高漲，全場揮動螢光棒不停大叫w-inds.，到w-inds.穿紅黑套裝以一曲《RainIsFallin'》出場時，粉絲即失控狂叫。
w-inds.勁歌熱舞三首歌之後，已多次來港的他們當然少不了晒廣東話，成員緒方龍一問粉絲：「玩得開心嗎？」千葉涼平則說：「大家好，多謝！」但最搞笑是主音橘慶太，當他自我介紹時，卻將「慶太」讀成日文「變態」的發音，令在場懂日文的歌迷笑到碌地！
扮港人講電話
今次演出三名成員更各自騷才華，涼平大晒舞技，後空翻又單手倒立，龍一及慶太則自彈自唱，晒結他技術。
中段三子又再講廣東話，更扮香港人講電話的語氣：「喂喂，係呀，係呀，真嘅真嘅？點解呀？」雖然無厘頭，但到粉絲笑爆嘴。到安哥時，w-inds.唱出《SomeMore》，慶太配合節奏拉高衫露肌肉，掀起高潮，結果唱最後一首歌《NewWorld》後連樂隊都離場，歌迷仍不肯走，三子最終為粉絲清唱多一首歌。
採訪：阮瑜
