噚日卓能（131）出年報，個個執行董事都有得加薪，除咗主席趙世曾，不但冇得加，仲要減近一成。
截至2011年6月底年度，冇董事酬金、冇退休計劃供款嘅趙世曾，淨收薪津630.9萬蚊，比2010年同期嘅697.7萬蚊，少咗66.8萬。唔好以為卓能業績唔好，主席要減人工。卓能2011年度純利升27%，全年股息仲加咗1.5仙。
雖然趙生人工減咗，但截至6月底，佢持有2.84億股卓能，比舊年增持咗近5000萬股，以每股全年派息8.5仙計，單係收息已經有2400幾萬，比舊年多咗約770萬。
舊年人工收少約70萬，但股息就多收770萬，除笨有精。當然公司業績增長，主席加人工都無可厚非，可見趙生為人風流，但數口都算勻真。