座駕洗白白　嘆咖啡睇住等

以往拎部愛車去洗白白兼換偈油，好多時係泊低部車，第二日先嚟攞。唔係唔想睇住部車，只係車房污糟，尤其啲汽油味，聞多一陣都暈。上周開幕嘅ThePit，雖然同樣係提供汽車換油同洗車服務，但就落本啲，除咗用英國皇室御用嘅汽車護理品牌Autoglym，仲幾個人一齊洗。

休息室有看台，可以睇住師傅點樣搞你部車。

換偈油加洗車$1299

負責人仲話，大部份服務都可以喺半粒鐘內完成，單係換油20分鐘內搞掂。幾十分鐘，嘆杯咖啡嘅時間就攞得返架車。ThePit特設休息室，有咖啡等飲品供應，有獨立梳化同電視畀客人嘆住等，休息室仲有看台，可以隔住塊玻璃睇吓師傅點樣幫座駕扮靚。換偈油加洗車，一次1299元。
記者：張韻珊　攝影：梁鑑章

由多位師傅一齊洗車，保證限時內完成。