出家人六根清淨，偏偏河南嵩山少林寺方丈釋永信（圖）近排被紅塵沾染。皆因網上有人引述少林寺弟子話，方丈喺海外最少有30億美元存款，喺美國、德國都有別墅，仲曾經同某某明星有染，甚至包養咗個北大女學生兼生埋仔，家母子住喺德國。
俾人咁講，佛都有火！釋永信喺少林寺網站發聲明，話呢啲全屬謠言，「完全是天方夜譚，是無中生有、惡意編造的誹謗」，佢仲公開懸紅5萬蚊人仔，徵求有關佢個人違法、犯戒傳聞嘅確鑿證據，「請第一時間向少林寺或執法部門舉報」。
疑反對上市得罪人
本來出家人應該與世無爭，釋永信今鋪俾人惡搞，據《京華時報》引述少林寺外聯處郝建統居士估計，謠言可能同釋永信唔同意少林寺上市，得罪咗某啲利益集團，所以俾人誣陷。內地傳媒早喺09年底就熱傳少林寺會喺今年上市，但今年個市咁差，要上都唔易，加上少林寺有人反對，上市計劃泡湯。如果真係因為咁惡搞方丈，真係阿彌佗佛，罪過、罪過咯！