【記者韓耀庭報道】人氣英國港男PeterLau旋風式返港近一個月，旅程接近尾聲，其好友為他舉辦的大型終極徵女友派對亦於昨晚在中環蘭桂坊舉行，玩樂至今晨才盡興而散。Peter總結對港女孩的印象，大讚靚女又友善，承認對幾個女仔有好感，「我聽晚就返英國，會同佢哋保持聯絡，一切睇緣份。」
形容港女友善靚女
父母在英國經營餐館的Peter，性格害羞，他形容香港女仔「好多都好靚女」︰「佢哋好友善，雖然未見過面，但係打電話嚟可以傾好耐。」他透露，素未謀面的女孩致電給他都會問長問短，「會問我幾歲，又問我係咪太子爺，都好多偈傾。」
Peter向記者展示手機，有女孩多次直接傳短訊給他，內容全是「IloveyouforeverPeter！」更有另一位女孩向他提出假結婚，然後讓傳媒追訪，Peter表示由始至終都不知道對方是誰，連對方照片也沒見過，對短訊內容都感到莫名其妙。
Peter稱，在英國很少中國人，故他對認識到好多香港新朋友感高興︰「我地搞咗好多活動，估唔到香港女仔會出嚟玩。」他不諱言，對某幾個女仔有相當好感，但拒絕透露她們的身份，只肯說︰「冇特定類型，只係覺得溝通時好啱feel。」他稱，暫未對心儀對象展開實際追求行動，「我聽晚就返英國，會同佢哋保持聯絡，溝通多啲了解多啲，睇吓有冇發展機會，一切睇緣份。」
強調自己是普通人
居住英國林肯市的Peter，因其好友為他大搞尋找女友派對引起關注，吸引英國《每日鏡報》等傳媒追訪而一夜成名，其人氣亦隨他回港度假而捲至。回想過去一個月，Peter表示走在街上不時被人認出，有人會回頭望他，亦有人會上前打招呼，他又分享了一件趣事︰「有次有個auntie走埋嚟話認得我，sell佢個女畀我，我問佢個女幾歲，佢話得6歲，我同佢講我等唔到。」不過，對於人氣急升，Peter直言「好唔慣」，強調自己只是普遍人，希望低調過生活。