三度「恐襲」旺角的擲鏹狂徒，一度銷聲匿迹，街坊昨乍聽意外，第一個反應就是：「又嚟料……」，在附近的檔販反應更大，直指：「咁樣搞法，唔使撈！」後來得知真相，才安心做生意，他們皆指狂徒一日未落網，始終是心腹大患，促警方盡快破案。
每逢周六，女人街勢必人山人海，昨依舊人頭湧湧，卻是圍觀漏通渠水意外的人士，現場被封鎖5小時，有閒心到女人街幫襯人不多，令檔販叫苦連天。一名檔販表示：「梗係驚啦，嗰個變態佬仲未捉到。」她稱，受事件影響，生意大跌兩、三成。另一檔販表示，事發後，少了遊客光顧，生意不及過往周六旺：「唔驚淋鏹水，我哋有帆布帳篷，最怕佢搞搞震，嚇親啲客人。」
《蘋果》記者